Gaia: kirola

Hirugarren urtez Kros Txikia antolatu du Zaragueta Herri Eskolak otsailaren 5erako. Proba lau adin tartetan banatu dute antolatzaileek, 2006-2007 urteetan jaiotakoak –A kategoria–, 2004-2005ean jaio zirenak –B kategoria–, 2002-2003koak –C kategoria– eta 2000-2001ean jaiotakoak –D kategoria–.

A kategoriakoek 150 metroko lasterketa egingo dute, Bkoek 300 metrokoa, C multzokoek 600 metro beteko dituzte lasterka eta, D kategoriakoek 1.000 metroko saioa egingo dute. Egun bertan goizeko 11:30ak arte dago izena emateko aukera, baina, aurrez Zaragueta Eskolan bertan –bertaratuta edo 943 894 052 telefonora deituta–, Kultur Etxean eta Karela kiroldegian ere eman daiteke izena.

Parte hartzaile guztiak, lasterketa egunean, goizeko 11:45ean, eskolako sarreran blduko dira eta leku berean jasoko dituzte gurasoek behin proba bukatuta. Sariak izango dira lasterka aritzen diren guztientzat.

Realeko neskak entrenamendua egitekotan ziren gaur, abenduaren 26a, arratsaldeko 16:00etan, Orioko Mendibeltz zelaian, baina azkenean ez da horrela izango.

Orioko Futbol Taldetik esan dutenez, entrenamendua datorren ostegunean, abenduaren 29an, ordu berean izango da Mendibeltzen.

Sortutako eragozpenengatik barkamena eskatu nahi dute antolatzaileek.

Orioko 3x3an sari bezala banatutako Lagun Aro GBC-Fuenlabrada partidako sarrerak segituan bukatu ziren. Oriotar asko izan zen partida ikusten harmailetan eta, horrez gain, bi atsedenalditan herriko jokalariak izan ziren kantxan jokatzen. Zarauztarren kontra aritu ziren herriko 15 neska-mutil.

Benjaminak

Infantilak

Esperientzia polita izan zuten oriotarrek eta hemen duzue partidatxo horietako bideo txiki bat. 

Orio Arraunketa Elkarteak zuzendaritza berria aurkezteaz gain, bazkide kanpaina berri baten berri eman du udaletxean egindako prentsaurrekoan. Ibon Huegun presidenteak hartu du hitza lehenengo eta zuzendaritza berriaren filosofia eta lan ildoak jendaurrean azaltzeko. 19 laguneko lantalde moderno, gazte, anitz eta dinamikoa gara. Kudeaketa serio eta profesionala egitera gatoz bakoitzak dituen indarguneak baliatuz, esan du Huegunek eta Orio Arraunketa Elkartea lehen mailara bueltatzen saiatuko direla. Horretarako ilusioz datozela esan du eta ilusio hori herritarrei helarazi nahi diotela; lanari beldurrik ez diotela; kudeaketarako herriko hainbat esparrutako jende anitzak osatutako zuzendaritza dutela; harrobia izango dela Orio lehen mailara igo dezakeen lehengaia eta dirua traineru bakarrera bideratu ordez, Orio Arraunketa Elkartea osatzen duten arraunlari guztietara zabaldu behar dela; anbizioz arituko direla, baina umiltasunez eta harrokeriarik gabe.

Kirol erronkak

Ondoren, Ibon Makazaga entrenatzaile berria kirol erronkei buruz aritu da. Esan du senior mailan traineruak markatuko duela helburu nagusia: Gure helburua izan behar da goi mailan ibiltzea ARC ligan eta  igoerako Play offerako bi txarteletako bat lortzea eta horretarako 4-5 trainerurekin egin beharko dugu borroka. Baina traineruaz gain aulki mugikorrean edo tostako beste ontzien arloan aritu beharra ere aipatu du. Badakigu estropada guztietara %100ean ezin dela joan, baina estropada non Orio han izango da. Arraunlariei buruz aipatu du 50 lagun hasi direla entrenatzen eta iaztik bi baja baino ez dituztela eta arraunlari berriak ere badituztela: jubeniletatik seniorretara pasa direnak; senior mailan beren burua probatzera azaldu direnak; eta arraun giroan ezagunak, beste klubetatik etorriak eta aurretik Orion ibilitakoak gehienak: Migel Angel Millares, Mikel Portularrume, Igor Makazaga bera, Asier Carballeda, Arkaitz Goñi, Txato Bereziartua eta Unai Amenabar. Plantillan arraunlari bakarra estreinatuko da Orioko klubean eta iazko jendearen jarraipenak emango dio oinarria eta zentzua lanari ez baikatoz ezer aldatzera baizik eta dagoenari eutsi eta ahal den neurrian aurrerapausoak ematera.

Bazkide kanpaina

Azkenik, Jose Luis Loidi presidenteordeak, Arraunketa Elkartetik egingo duten bazkide kanpainaren berri eman du. 1.400 bazkide dauzkagu eta gauden egoera ekonomikoan zaila dela jakin arren, 2.000 lortzera heldu nahi dugu. Oriokoak, Oriotik kanpokoak, jakin baitakigu Oriotik kanpo jende hori asko dagoela, animatzen gaituztenak… Beraz, horiei esan nahi diegu bazkide izatea dela guri laguntzeko modua.

Bazkide kanpainarako etxeetara banatu duten orriaz gain, San Nikolas festetan, goiz eta arratsaldez plazan izango dira elkarteko kideak bazkide izan nahi duten horiek hartzeko eta hauen datuak jasotzeko. 

Ibon Huegun presidenteak kanpainari jarri dioten leloaren berri ere eman du: Hemen gatoztik! da leloa. Hori zen Orion aspaldian zegoen traineru baten izena, herrian ilusioa pizten zuen trainerua eta oriotarrez osatua, anbizio handikoa, Beraz, balore horiek berreskuratu nahi ditugu eta horretarako oriotarrak eta Oriotik kanpoko Orio zaleak nahi ditugu bidelagun.

Aurrez ere antzeko proba bat eginak dira Urtetako sansebastian jaietan. Oraingoan Orion egingo dute proba Heldu!ko mutilek eta Castaño idiak. 

Plazan izango da proba, 17:30etik aurrera eta botika paretik bordatxo parera. Harriak 900 kilo pisatuko ditu eta Izetarena da.

Gainontzeko xehetasun guztiak, bideo honetan ikusi ditzakezue:

Imanol Garmendia Maiz arraunlari donostiarrak irabazi du Euskadiko 1. arraun-ergometro txapelketa. Orioko arraun elkartean dabil Garmendia eta 19 urte baino ez dituen arren, 6 minutu eta 23 segundoan geratu zuen kronometroa 2.000 metroko proban.

Bigarren izan zen Melkiades Verdurasi segundo bat atera zion eta hirugarren izan zen Bruno Fernandezi hamar. Oriok izan zuen ordezkari bakarra zen Garmendia eta sasoian jarraitzen duela erakutsi du, udan aulki mugikorreko munduko txapelketak jokatzen izan ostean.

Asteburuan bukatu dira Aiako Kintopeko 10. idi-probak. Aurreko asteburuan Irarreta anaiak jarri baziren buruan, azkenean hirugarren izatearekin konformatu behar izan dute.

Asteburu honetan Kintopeko irabazlea izan den Iñaki Lopategiren idi parea izan da jaun eta jabe. Lopategiren idiek 58 plaza egin dituzte, bigarren izan den Ixidro erretegiko idi pareak baino ia 5 gehiago. Ixidro erretegi azkoitiarreko idi-pareak 53 plaza, 3 zinta eta 1,87 metro egin ditu. Aurreko astean Irarreta anaien idiek 52 plaza, 7 zinta eta 1,35 metro egin zituzten. 

Argazkian azaltzen direnak: Igor Iturain –Aiako alkatea–, Luis Lopene, Paulo Aldalur –Aiako idi-dema antolatzailea, Rafa Alegria –Inaki Lopategiren partez saria jaso zuena– eta Jexus Aranberri  –Aiako idi-dema antolatzailea–.

Txapelketa, abenduaren 8an, goizeko 10:00etan hasita jokatuko da. Goizean, preminibasket, minibasket eta infantilek jokatuko dute eta arratsaldeko 16:30ean hasiko dira kadeteak eta seniorrak.

Hortaz, hauek dira txapelketako mailak:

- Preminibasket: LH3 eta LH 4
- Minibasket: LH5 eta LH6
- Infantilak: DBH1 eta DBH2
- Kadeteak: DBH 3 eta DBH4
- Seniorrak: +16 urte (1995a edo lehenago jaiotakoak)

Izen-ematea www.zast.es orrialdean edota Karela kiroldegian egin daiteke abenduaren 5a baino lehen. 20 euro kostatuko da izen-ematea, baina kamiseta jasoko dute opari jokalari guztiek. Horretaz gain, bestelako sariak eta zozketak ere izango dira. Talde mistoen artean –bi neska edo gehiago dutenen artean– ere sari bereziak izango dira.

Arrate Indo eta Naroa Beldarrain oriotarrak Gipuzkoako 2. mailako gomazko palako txapeldunak dira, urriaren 23an, Zarauzko Aritzbatalde pilotalekuan, Altzatarra elkarteko bikoteari irabazi ostean.

Finalera partidarik galdu gabe iritsi ziren oriotarrak baina, partidaren erdia jokatu arte, gogorra izan zen lehia. Bikote donostiarra 14-15 jarri zen partidaren lehen zatia jokatu zenean eta, momentu hartatik bukaera arte, oriotarrak beren jokoa egiten hasi ziren.

Gauzak horrela, partidaren hondarrera freskoago iritsi ziren Indo eta Beldarrain eta bukaeran 30 eta 20 irabazi zuten, Gipuzkoako txapela irabaziaz.

Orioko arraun elkarteko hauteskundeetara zerrenda bat aurkeztu da dagoenerako. Hainbeste zurrumurruren ostean, lehen zerrenda ofiziala zein den jakinarazi du arraun elkarteak.

Aurreko zuzendaritza batzordeko kide asko daude tartean, baina baita berriak ere, guztira 17ko zerrenda bat osatu arte.

Zerrenda honela geratu da osatuta:

Presidente: Ibon Huegun Bengoetxea.
Presidentorde-1: Joxe Luis Loidi Aranbarri.
Presidentorde-2: Joxe Ramon Garate Aldaz.
Idazkari: Ramon Alkain Ezeiza.
Bokalak: Joxe Manuel Agirresarobe, Jexux Mari Aierza, Iñigo Arruti, Joxe Carrera, Lino Mari Carrera, Aitor Errasti,
Iñigo Garmendia, Zigor Gazpio, Patxi Iribar, Angel Martinez De La Hidalga, Oihane Mateos, Joxe Inazio Mujika, Angel Rekalde.

Horrenbestez, beste zerrendarik aurkezten ez bada ostirala baino lehen, hauek osatuko lukete datozen lau urteetarako zuzendaritza batzorde berria.

Iaz izandako arrakasta ikusita, Euskal Herriko txapelketaren barruan, Kukuarriko 2. raid lasterketa jokatuko da Orion. Proba goizeko 9:00etan hasiko da Hondartzan, eta 40 km egin beharko dituzte. Bidearen erdia egin eta gero, deskantsurako tartea hartuz, animalien egoera aztertuko dute, baldintza egokietan ez dagoena lasterketatik kanpo utziz. Izan ere, horrelako proba neketsuetan zaldiaren osasuna gertutik jarraitzen dute antolatzaileek.

Ibilbide gorabeheratsua eta teknikoa izango da egin beharrekoa. Hondartzan hasi, handik Itxaspera joan eta Igeldoko txakurtegira egingo dute ibilbidearen lehen zatian. Handik Egiluzera jo, eta goiko bidetik Bentara joango dira; Muniota pasa, Longara jaitsi eta handik Anduraino jarraituko dute zaldiek beheranzko bidean. Azkenik, Andutik Talaira igoko dira, handik berriz ere Itxaspera jaitsi eta itzulia hondartzan bukatzeko.

Pello Saizarren ustez, ibilbidea bukatzen lehenak 14:00ak alderako bukatuko du proba. Herritarrei proba gertutik ikustera animatu nahi die Saizarrek, gutxitan izaten baitira halakoak hemen inguruan.

Orioko futbol taldeko kadete mutilek garaipen erosoa erdietsi zuten atzo, urriak 9, Azkoitiko Anaitasuna taldearen aurka.

Lehen zatian atzetik joan ziren markagailuan mailaz igo berri diren kadeteak, baina bigarren zatian partidari buelta eman eta 9-3 irabazi zuten partida.

Gauzak horrela, denboraldiko lehen garaipena lortu dute oriotarrek eta Anaitasuna utzi dute sailkapeneko azken tokian. Hiru puntu ditu Orioko taldeak, Zarautzek eta Lagun Onak talde azpeitiarrak bezala eta sailkapeneko azken postuetan daude oraindik.

Orioko Herri Ikastolak, Orioko Herri Lasterketaren 3. edizioa antolatu du. Kross hau bi aldiz jarraian antolatu ostean geldirik egon da, eta Ikastolaren ekimenez, berriz lehiatuko dira korrikalariak Orion. Urriaren 23an izango da lasterketa, goizeko 11:00etan hasita.

Igande eguerdian izango den lasterketak, ibilbide laburra eta luzea izango ditu. Laburrak 7 kilometroko luzera izango du eta luzeak 14 kilometrokoa. Proban parte hartzeko, gutxienez, 16 urte beteta izan beharko dituzte lasterkariek eta izen-ematea dagoeneko martxan dago.

Herri krossa elkartearen webgunean eta Orioko Herri Ikastolaren webgunean eman daiteke izena. Behobia-Donostia probarako prestaketa egiteko modu oan korrikalarientzat.

Orioko arraun elkarteko lehen taldeko arraunlariek Karkarari bidalitako mezuan herritarrei gutun hau zabaltzeko eskatu dute:

Eskerrik asko guztioi

Denboraldi  luze bezain gogor hau amaitu denez, idatzi hau egin nahi izan dugu Orioko arraunlariok, denboraldi osoan zehar eta batik bat gehien behar genuenean, denboraldi amaieran, oriotar guztiek eta oriotar ez diren oriotar zale guztiek eman dizkiguten animo eta laguntza guztiak eskertzeko

Historia osoan zehar Orioko trainerua maila gorenean egon da ia beti, eta asko ziren oriotar zaleak gaizki ohituta edo irabazten bakarrik zekitela pentsatzen zutenak. Aurten ordea, historiako denboraldirik kaxkarrena egin dugu, Kontxako estropadetan ez sailkatzeaz gain, TKE ligan azken postua ere lortu baitugu. Ez zuen inork espero, ezta guk ere, baina halaxe suertatu da, eta momentu zail hauetan, egunero-egunero jaso ditugu animoak eta laguntzak, egoera zaila bazen ere. Izugarria izan da sufritzen ari ginena kontutan hartuta, piztu zaigun poza, zalegoa eta oriotar guztiak gurekin zeudela jakitean, honek eman digu indarra azken estropada hauei aurre behar bezala egiteko.

Guzti honegatik eta beste hainbat momentugatik, eskerrak besterik ez ditugu eman nahi kolore horia maite duen orori, eta hemendik aurrera ere, momentu zail hauek igarota, kolore horia maitatzen jarraituko dutenei, mailaz jaisten bagara ere, ahal dugun guztia egingo dugulako Orioko trainerua berriz gorenera iristeko eta gure zalegoari lehenbailehen poza beren barnean pizteko. Besterik gabe, mila esker guztioi eta orain inoiz baino ozenago: AUPA ORIO!!

ORIOKO ARRAUNLARIAK

Ostiralean, irailaren 23an Orio Arraunketa Elkarteko ezohiko batzarra izango da 19:00etan, Ikastolako aretoan eta horren harira elkarteko presidente Joxe Kruz Expositok hainbat ohar jakinarazi nahi ditu:

• Batzarra tokiz aldatu dute leku gehiago izateko, beraz, kultur etxean izan beharrean Ikastolako eraikin berriko areto nagusian izango da.
• Batzarra, ateak itxita egingo da. Horretarako, bigarrengo deialdian, 19:00etan, atea itxiko dute.
• 18 urtetik gorako bazkideak eta urteko bazkide-kuota eguneratua dutenek bakarrik izango dute sartzeko ahalmena, bozkatzeko eskubidea duten bakarrak, alegia.

Asteburuan Bizkaiko uretan jokatu dira TKE ligako play-offeko bi estropadak, Bermeon eta Portugaleten. Lehen estropada itsaso zabalean jokatu zen eta bigarrena Ibaizabalgo itsasadarrean.

Larunbatean estropada irabazi zuen Oriok, 5 segundora izan zuen Portugalete eta atzerago geratu ziren Zierbena, Camargo, Cabo da Cruz eta Chapela. Igandean, bigarren izan zen, Portugaleterengandik 6 segundora. Estropada estuagoa izan bazen ere, azken luzean nagusitu ziren oriotarrak.

Hori dela eta, denbora eta puntuazio ofizialei begiratuta, Portugalete eta Zierbenak irabazi dituzte 2012. denboraldian TKE ligan izateko aukera ematen duten txartelak.

Dena den, Estropu operazioaren epaia emandakoan gauzak bestelakoak izan daitezke. Urdaibai TKE ligatik kaleratzea erabakiz gero, Oriok beste behin TKE ligan jarraituko luke. Portugalete ere bertan izango zen play-offeko irabazle izateagatik, baina denbora estraofizialetan hirugarren izan den Zierbena KAE-1 ligan izango litzateke datorren urtean. Haren ordez Camargok ere TKE ligan izateko eskubidea luke, Urdaibairen kanporatzeak 2011. urteko ligako 10. postua emango liokeelako. 

Gauzak horrela, epaitegietan erabakitzen denaren zain geratzen dira Orio, Zierbena, Camargo eta Urdaibai.

Gogotsu atera ziren Orioko neskak ostiraleko sailkapen estropadan Donostiako portutik eta gogoz egin zuten arraun Kontxako badian, baina ez zuten lortu bandera jokatzeko txartelik, izan ere, seigarren tokian bukatu zuten erlojuaren kontrako sailkapen estropada.

Getaria-Tolosa sailkatu zen lehen tokian 10:29,64ko denborarekin eta honen ondoren, hurrenez hurren, Galicia-Rianxeira, Zumaia-Kirol Jokoa, Bizkaia taldea, Batelerak-Iberdrola, Orio-Babyauto eta Hondarribia-Orsa (11:18,06). Oriori 20 segundoko aldea atera zion lehen sailkatuak lehen ziabogan eta bukaeran, berriz, 36 segundo eta 2 ehunenekoa. Hona hemen sailkapena:

                                        Denbora               Aldea          

1.- Getaria-Tolosa            10:29,64              --------

2.- Galicia-Rianxeira         10:35,88             0:06,24

3.- Zumaia-Kirol-Jokoa      10:41,70            0:12,06

4.- Bizkaia taldea               10:56,44            0:26,80

5.- Batelerak-Iberdrola       10:58,92            0:29,28

6.- Orio-Babyauto               11:05,66           0:36,02

7.- Hondarribia-Orsa           10:18,06           0:48,42

Igandeko estropadan nesken lau traineru izan ziren arraunean eta aurreikuspenak hautsiz Zumaia sailkatu zen lehen tokian eta honen ondoren Galicia, Getaria-Tolosa eta Bizkaia taldea. Lehenengo eta bigarrenaren artean 4 segundo eta 32 ehuneneko aldea dago eta hauek hirugarrenari 70 ehuneneko baino ez zizkioten atera. Beraz, dena hurrengo igandeko estropadan erabakiko dute.

Gizonezkoetan Urdaibai

Orio sailkapen estropadan kalean geldituta, igandekoa, mutilentzat ere, Kontxako banderako lehen jardunaldia izan zen. Denborei erreparatuta argi ikus daiteke aldea, izan ere, haizea gogortu izanak itsasoaren baldintzak aldatu zituen eta ia erabakita utzi zuen datorren igandean Kontxako bandera zeinena izango den. Mikel Portularrume Paorra aiarraren eta Migel Angel Millares oriotarraren Urdaibaik, Jose Luis Kortaren Kaikurekiko 33 segundoko aldearekin esku-eskura dauka bandera. Datorren igandeko ohorezko txandan ariko dira irailaren 4an lehen txandan aritu ziren traineruak: Urdaibai, Kaiku, Pedreña eta Donostiarra. Gizonezkoen sailkapena:

                                  Denbora               Aldea          

1.- Urdaibai                21.19                    --------

2.- Kaiku                    22.03,42               0.33,56

3.- Pedreña               22.24,56               0.54,70

4.- Donostiarra          23:00,46               1.30,60

5.- Astillero                23.51,48               2.21,62

6.- Hondarribia          24.33,60                3.03,74

7.- San Juan             24.34,02                 3.04,16

8.- Tiran                    24.50,38                 3.20,52 

Lekeition hirugarren

Irailaren 3an Lekeitioko XXXIII. Ikurrina izan zen jokoan eta han zen Orioko trainerua ere. Joxean eta Aitor Olaskoaga eta Jon Iriondoren Portugaleteko trainerua izan zen irabazle 20 minutu, 23 segundo eta 3 ehuneneko denborarekin; etxeko trainerua, Lekittarra izan zen bigarren 15 segundo eta 89 ehunenekora; eta Orio hirugarren 25 segundo eta 66 ehunenekora. Ondoren, hurrenez hurren sailkatu ziren: Amegrove, Cabo da Cruz, Zumaia, Zarautz, Elantxobe, San Pedro, Hondarribia B eta Chapela.

De Anta Paralinpiar Jokoetara

Bestalde, Orio Arraunketa Elkartean ari den Edorta de Anta tolosarrak 2012an Londresen izango diren Paralinpiar Jokoetarako txartela lortu du Eslovenian jokatutako Munduko Txapelketan. Arraunketa egokituan, bakarkako ontzian aritu zen De Anta eta final erdietarako aukera ozta-ozta lortu ondoren, finalerako txartela ere ehunenekoetan erabaki zen. Finalean, berriz, seigarren tokian sailkatu zen eta finalerakoarekin batera bere helburu nagusia lortu zuen Paralinpiar Jokoetarako txartela. Munduko Txapelketan zehar, Juan Angel Garmendia Xarpas izan du laguntzaile lanetan.

Beste urteetan baino mugimendu gutxiago nabari zen arratsalde partean Donostiako moilan. Kamiseta hori gutxiago bai, behintzat. Baina 18:00ak gerturatu ahala moila bazterrak eta Aquariumaren gaineko txokoak horituz joan ziren.

Itxaropena bazen herritarren artean. 14. izan zen Orio irteten eta aurretik Urdaibai izango zuen denborak markatzen.

Aurreko multzoko Amegrove eta Portugaleteren denborak ere kontuan hartzekoak ziruditen hasera batean. Ziaboga eman zuten Amegrovekoek eta 9:32ko denborarekin jendearen lehen marmarra sortu, izugarrizko denbora baitzen. Atzetik joan ziren denek denbora dezente kaskarragoa egin zuten, Urdaibaik 9:29 egin zuen arte. Oriok 9:30 egin zuen, eta atzetik zetozenak ez ziren urruti ibili. Lehen 10ak, onenak, 8 segundoren bueltan ibili ziren ziabogan, Kaiku buru zela.

Barrurakoan lan handiagoa izan zuten arraunlariek, haizea eta korrontea kontra baitzituzten. Amegroveren 19:32 erreferentzia ona izan zen, harik eta Urdaibaik 19:23an kronometroa geratu zuen arte. Oriok 19:34 egin zuen eta oraindik itxaropena izateko motiboak baziren. Baina azkar uxatu ziren, beste txalupak sartzen joan ziren neurrian.

Astillerok irabazi zuen estropada, baina segundo berean Kaiku eta Tiran sartu ziren hurrenez hurren. 19:19 hirurek eginiko denbora, ehunenekoak tarteko. Hondarribia, Urdaibai, San Juan eta Pedreña dira sailkatu ziren beste lauak. 11 segundo lehenengotik zazpigarrenera eta Orio hortxe, 4 segundora, traineru bakarreko aldera.

Play-offean aurkari izango dituen guztiak atzean utzi zituen Joxe Luis Agirreren koadrilak. Camargo 7 segundora, Zierbena 14ra, Portugalete 17ra, Chapela 29ra eta Cabo da Cruz 34ra. Moralez gainezka egoteko arrazoirik ez zaie falta, beraz, oriotarrei hilaren 17 eta 18an jokatuko diren estropadetarako.

Gaur neskak

Gaur, ostirala, irailaren 2a, arratsaldeko 18:00etan jokatuko da nesken Kontxako Banderako sailkapen estropada. 7 ontzik hartuko dute parte, eta tartean Orio izango da. Helburu oso zaila dute eskuartean, baina gogotsu daude estropadarako, nahiz eta 4 baino ez direla sailkatuko jakin.

Igandean izango dira lehen jardunaldiko estropadak. Lehenbizi neskek jokatuko dute 11:30ean eta, atzetik, 12:00etan gizonezkoen txanda izango da. Lehen txandan Urdaibai, Kaiku, Pedreña eta Donostiarrak jokatuko dute. Bigarrena Astillero, Tiran, Hondarribia eta San Juanek.

2 metro inguruko olatuak espero dira eta eguraldiak ez omen du gehiegi lagunduko. Mutiletan ez dira Orioko Arraun Elkartekoak izango, baina oriotarrak eta aiarrak izango dira tostetan, beste traineruetan, banderaren lehian.

Kaikun, entrenatzaile ari da Joxe Luis Korta; Astilleron, Jon Salsamendi; Urdaibain, Mikel Portularrume Paorra eta Miguel Angel Millares arraunean ari dira; Hondarribian, Mikel Orbañanos, Axier era Gorka Puertas anaiak; eta azkenik, San Juanen, azken urteotan Orion bizi den Igor Makazaga.

Neskak ez badira sartze, traineru horirik ez da izango Kontxa estropadetan lehenengo aldiz azken 20 urtetan, baina herritar ugari bai animatzeko, beraz, igandean Kontxan.

Donostiako udaletxean egin dute zozketa eguerdian aurtengo Kontxako Banderako sailkapen estropadako (Irailak 1) irteera ordena aukeratzeko. Estropada bi tandatan jokatuko dute eta bakoitzean 12 traineruk hartuko dute parte.

Lehen tanda Hibaikak hasiko du eta honen ondoren, hurrenez hurren, arituko dira: Cabo da Cruz, Zierbena, Amegrove, Deusto, Santoña, Portugalete, Chapela, Santurtzi, Trintxerpe, Isuntza eta Zarautz.

Bigarren tandan, berriz, faboritoak izango dira. Urdaibaik irekiko du tanda eta honen ondoren arraun egingo dute Orio, Hondarribia, Pedreña, Zumaia, Kaiku, Koxtape, Tiran, Camargo, Astillero, Castro eta San Pedroko arraunlariek. Guztira, beraz, 14. tokian aterako da Orioko trainerua.