Auziak aurrera eginez gero, sei urtera arteko kartzela zigorra jaso dezakete

Abuztuaren 24an, euskal preso politikoen eskubideak aldarrikatzeko kartelak jartzen ari zirela, hiru oriotar identifikarazi zituen isilpeko poliziak. Ondorioz, Ertzaintzaren Zarauzko egoitzan agertzeko deia jaso zuten eta han jakinarazi zieten gertatua Auzitegi Nazionalaren esku utziko dutela. Terrorismoa goratzea egotzi diete eta auziak aurrera eginez gero sei urtera arteko kartzela zigorra jar diezaiekete.

Herriari gertatzen ari denaren berri ematea zen kartelak jartzearen asmoa. Orioko Amninistiaren Aldeko Mugimenduak eta Orioko Ezker Abertzaleak bidalitako mezuaren arabera, karteletan Amnistiaren mugimenduaren aldeko elkartearen zigilua ageri zen eta Estatu Espainolak diseinatutako estrategia etnozidaren parte da. Euskal izaera duen ororen aurka ekiteko erabakia -dena ETA den aitzakian- hartu zutenetik etengabe bortxatzen dituzte euskaldunon eskubideak: Ley de partidos, Mahai Nazionala atxilotzea, Segi, Udalbiltza, Egin, Egunkaria, Amnistiaren aldeko mugimendua… Azken gertaera honek estrategia horri erantzuten dio.  

Iganderako sailkatuta gustura dago San Juango entrenatzaile eta arraunlaria

Atzoko eta gaurko protagonista da, zalantzarik gabe Oriora ezkonduta dagoen Igor Makazaga, San Juango entrenatzaile eta arraunlari pasaitarra. Aurreikuspenak hankaz gora utziz, Kontxako sailkapen estropadan aurrena egin zuten atzo sanjuandarrek, badia alderako, barrurako, luze ikaragarria –inoiz egin den itzulerarik azkarrena- egin ondoren. Kanpo aldera ere ez ziren batere gaizki ibili, ziabogan 3.posturako lehian ibili baitziren Hondarribiarekin. Makazagaren ustez joaneko luzea da baloratu behar duena, itzulikoan olatuak tokatu izana zorizkoa delako.

Kontxa bereziki prestatu dute sanjuandarrek aurten. Ez ziren Espainiako txapelketara joan, ez zirelako sailkatu, eta Ligan estutasunik ez izateak Kontxara begira jarri zituela aitortu ditu Makazagak.

Datozen igandeetarako arrosaz jantzita joateko deia egin die San Juango entrenatzaileek zaleei; beren babesa eta indarra jaso nahi dituzte: azken urteotan garai zailak bizi izan ditugu herrian eta gorabehera horiek gaindituta, berriz, trainerua eta arraunlariak animatzeko gogoz nabari dugu jendea. Bestelako giroa dago aurtengoan Pasaian eta horrek asko lagundu gaitu eguneroko lanetan. Ea herria hutsik geratzen den igandean! Belaunaldiz belaunaldi aitonarengandik hasi eta birlobenganaino… arraunlari izateak Pasaian bertan sentipen eta ilusio bereziak sortzen dituela dio Makazagak. 

Aurkariez galdetuta, berdintasuna dela nagusi adierazi du: Orioren eta Astilleroren denborei begiratuta, bigarrenaren eta seigarrenaren artean 10 segundoko aldea besterik ez dago. Denbora horietan ibiliko ginen gu geu ere olaturik hartu ez bagenu. Ez da faboritorik ematera ausartzen, taldeak duen egunaren arabera eta tokatzen zaion kalearen arabera gauzak asko alda daitezkeela jakitun.

Lehen txandan arituko dira sanjuandarrak datorren igandean, Donostiarrak, Astillero eta Kaikurekin batera. Orio eta Urdaibai alboan nahi zituen Igorrek, baina ez da horrelakorik izango, lehen igandean behintzat: TKE Ligan aurkari zuzenak izan ditugu Orio eta Urdaibai eta haiek ditugu erreferentzia. Donostian arituko diren arraunlari askok lehen Kontxako estropada izango du eta bi talde horiek alboan izan bagenitu, orain arteko San Migel Ligako edozein estropadaren itxura hartuko zukeen. Ez da horrela izango, ordea, eta mutilak lasaitzen saiatu beharko dut orain, gure estropada erritmotik ez gaitezen atera.

Etzidamu ikusiko da zer gertatzen den.

Pedreñarekin, Urdaibairekin eta Hondarribiarekin arituko da Orio Kontxako aurreneko igandeko 2. tandan

Urtero izaten omen da sorpresaren bat Kontxako sailkapen estropadan eta hala izan zen atzo arratsaldean jokatutako aurtengo edizioan ere: kanpoan geratu da Castro eta San Juanek, berriz, barrurako ikaragarrizko luzea egin eta denborarik onena markatu zuen. Oriok, ere, ez du hutsik egin eta datozen bi igandeetan, 77. aldiz –20.ena jarraian–, Donostian izango dira gure arraunlariak, 32. bandera etxera ekartzeko lanean. Oriokin batera Kaikuk, Urdaibaik, Hondarribiak, Astillerok, eta Pedreñak ere lortu dute 2010eko Kontxako estropadan aritzeko txartela Donostiako traineruarekin.

Denborak

Aurreneko tandan atera ziren trainerurik indartsuenak, faboritoak: Kaiku izan zen Donostiako badian bi luzeak egiten aurrena. Pasaiako bi ontzi atera ziren gero; sanpedrotarrak aurrena eta San Juan gero. Zumaia eta Hondarribiaren txanda izan zen ondoren. Castroren eta Astilleroren atzetik atera zen Orio, zortzigarren. Tiranekin, Pedreñarekin, Urdaibairekin eta Zarautzekin bukatu zen aurreneko tanda. San Juan eta Orio izan ziren 20 minututik behera egin zuten ontzi bakarrak: 19 minutu, 41 segundo eta 62 ehunenen geratu zuen denbora San Juanek eta 19 minutu, 57 segundo eta 72 ehunenen Oriok. Pasaitarrak izan ziren, beraz, atzokoan azkarrenak.

Bandera irabazteko kiniela guztietako faborito den Kaiku sailkatu zen hirugarren: 20 minutu, 2 segundo eta 90 ehunen. Atzetik, Urdaibai –20 minutu, 3 segundo eta 18 ehunen–, Hondarribia –20 minutu, 6 segundo eta 66 ehunen–, Astillero –20 minutu, 6 segundo eta 98 ehunen– eta Pedreña –20 minutu, 16 segundo eta 32 ehunen–. Urtero bezala, Donostiako ordezkariek beteko dute geratzen den lekua, datorren igandean.

Sanpedrotarrak izan ziren 8. eta hortik aurrenera, hurrenez hurren, horrela geratu ziren: Castro, Camargo, Chapela, Tiran, Zumaia, Isuntza, Santurtzi, Amegrove, Zarautz, Zierbena, Samertolameu, Deustu, Getaria, Trintxerpe, Hibaika eta Luanco.

Kontuak kontu, oriotar ugari izango da arraunean, bakoitza bere koloreak defendatuz, datozen bi igandeetan. 

Aurreneko igandean

Atzo bertan egin ziren irailaren 5ean, aurreneko igandean, jokatuko diren estropadetarako txanden zozketak. Urdaibai, Pedreña eta Hondarribia izango ditu aurkari Oriok bigarren txandan. Kaiku, Astillerok, San Juanek eta Donostiarrakek osatuko dute lehenengoa.

Argazki gehiago ikusteko klikatu hemen.

Denboraldiaurrea bukatzear daudela, entrenamendu saioetan murgilduta daude

2010-11 denboraldia gogor prestatzen ari dira aurtengoan ere erregional kategorian aritzen diren Orioko futbol taldeko mutilak. Abuztuaren 9an hasitako denboraldiaurrea bukatzear dute eta gogoz eta ilusioz daude Liga noiz hasiko zain. Irailaren 11n izango da hori eta Mondragon B taldearen aurka neurtu beharko dituzte indarrak etxean, Mendibeltzen.

Momentuz, entrenamenduetan buru-belarri dabiltza, astean hiruzpalau saio eginez. Taldeko entrenatzaile Jaime Coladok adierazi digunez, oso gustura dago taldearekin. Iazko denboraldia Oriorekin bukatu zuten jokalari gehienak dituzte aurtengoan ere eta horiez gain, jubeniletatik igotako lau lagun, Zarauzko taldetik etorritako Mikel Rauleaga eta Jon Zaldua, eta kanpoko taldeetatik etorritako Borja Zubizarreta –Hernaniko futbol taldetik– eta Josu Solaberrieta –hirugarren mailan aritzen den Lagun Onaketik– izango dituzte aurten kamiseta horia jantzita. Guztiei eskerrak emateko moduan dagoela esan digu Coladok.

Denboraldiaurrea

Lau partida jokatu ditu Orioko futbol taldeko erregionalen taldeak denboraldiaurrean: Imanol Alguacil txapelketan aritu ziren aurrena. Zarauzko eta Zumaiako taldeen kontra jokatu zuten lehenik eta behin. Husnako berdinketarekin konformatu behar izan zuten oriotarrek. Zarautzek irabazi zuen txapelketa.

Zumaiaren aurka aritu ziren gero, bigarren aldiz. Josu Solaberrietaren golari esker, huts eta bateko emaitzarekin irabazi zieten oriotarrek. Azpeitiako Lagun Onaken kontra, berriz, 1-0 galdu zuten.

Denboraldiaurrea bukatzeko, azken partida jokatuko dute larunbat honetan bertan, Mendibeltz zelaian. Txurrukako aterpetxean atseden hartzen ari den talde bizkaitar bat izango dute aurkari.

Tiraneko arraunlariek Txurrukako aterpetxean hartzen dute ostatu

Kontxako estropadako sailkapen eguna da gaurkoa eta arraunlariak ez ezik zaleak ere Kontxari begira daude goizean goizetik. Donostiako uretan entrenatu dute aste honetan Tiraneko arraunlariek, baina atseden hartzeko Orio-Aia aukeratu dute, Txurrukako aterpetxea, hain zuzen ere. Arraunlariek Orioko egonaldiaz eta Kontxarako nahiez hitz egin dute.

Badira urteak Kontxako estropadaren harira Oriora etortzen direna. 1996an izan ziren Tiranekoak lehen aldiz gurean eta hurrengo urtean Errota landetxera joan ziren arren, Txurrukan izan dira gainontzeko urteetan. Orioko estropadarako etortzen dira eta ostegunean Kontxako sailkapen estropada jokatuta sailkatuz gero, igandera arte gelditzen dira; ondoren, etxera itzuli eta hurrengo iganderako bueltatzeko. Daniel Rua Tiraneko arraunlariak dio oso gustura egoten direla Txurrukan: Oso ongi hartzen gaituzte, hotel bat baino hobea da guretzat. Daniel Perez entrenatzaileak urtetan Txurrukako arduradunekin egindako lagun arteko harremana azpimarratu du, primeran hartzen eta zaintzen gaituzte, dio. 

Aste osoa etxetik kanpora pasatzen duten arren, taldearen onerako dela dio Ruak: Etxea beti da etxe, denontzat, baina hemen talde lana handiagoa da, dena elkarrekin egiten dugu: jatorduak, gainera denok berdina jaten dugu; eguna denok batera antolatzen dugu, entrenamenduetara elkarrekin joan, aisialdia elkarrekin partekatu…

Arraunlari izateaz gain beste lanbide batzuk dituzte eta zaila da partekatzea, lan gogorrak direlako batzuk. Gainera hemengoa bezalako egonaldietarako jai egunak pilatu behar izaten dituzte opor gisa hartzeko.  Baina hona ere bestelako lanetara, arraunera, datoz. Daniel Ruak, esaterako, atunontziak eta merkantzia-ontziak konpontzen egiten du lan eta hodi pisutsuak bizkarreratu behar izaten ditu eta. Lanean ondo nekatu ondoren, entrenatzera joaten da, baina arrauna maite duelako ematen du ahal duen guztia: Guk arraunean ibiltzeagatik ez dugu kobratzen; denboraldi bukaeran estropadetan jasotako dirua denon artean banatzen dugu. Klubaren baliabideak ere urriak dira; ez daukagu sendagilerik ere.

Etxekoak gertu

Taldekideekin bai, baina bada familia ere berarekin ekartzen duenik ere. Aukera dutenak etortzen dira, emazteak, seme-alabek eta arraunlariek eskertzen dute etxekoak gertu izatea. Haiek ere beren ibilbidea jarraituko dutela diote eta Kontxan gogor animatuko dituztela. Estropadetan bai baina arraunean ere beren bidea jarraituko ote dute? Umeak gurekin pozik daude. Nire alaba ahal duenetan klubera etortzen da nirekin, baina taekwondoan ere ibiltzen da eta aurrerantzean bide hori hartuz gero agian hobe. Arrauna droga bat bezalakoa da, harrapatuz gero zaila da uzten, eta oso kirol gogorra da, dio Ruak.

Donostian egiten dute entrenamendua. Goizean goiz jaiki, gosaldu eta motxila prestatuta joaten dira hara. Bueltan, dutxatu eta bazkarira bitartean atseden hartzen, ping-pong-ean jolasten... egoten dira eta arratsaldean berriz entrenatzera. Prestaketa saioa bi zatitan banatzen dugu, horrela, eta itsasoa egonez gero, ez zaizkigu giharrak hainbeste kargatzen, dio Ruak. Itzuli, dutxatu eta kartetan jolastu, berriketan egin edo atseden hartu ondoren afaltzen dute eta herrira ere joaten dira kafetxo bat-edo hartzera. Kalera joan eta sumatzen dute jendeak ezagutzen dituela, besteak beste tabernetan egon eta zerbait esaten dietenek. Daniel Ruak eskertzen du herritarren harrera. Orioko jendeak asko maite gaitu. Iluntzean zerbait hartzera ateratzen gara, hondartza aldera ere egin dugu buelta… eta herritar batzuek badakite nor garen. Beharra izanez gero, hemengo fisioterapeutek tartetxoa egiten digute kontsultan. Gustura gaude Orion eta gainera toki lasaia da.

Toki lasaia beraientzat, baina herria ez da batere lasai egoten estropada egunetan eta arraun elkartearekin bat datozela koloreak kanpora aterata erakusten du askok. Ruak dio Orioko banderak nonahi ikusten direla:Gurean ezta erdia ere; aurten hala ere etxean jokatutako estropadan harritu egin gaitu jende dezente gerturatu baita ikustera. Castron eta Urdaibain ere arraun zale asko dagoela nabaritzen da.

Amilibiaren konponketak

Asteazken arratsaldea libre hartu zuten arraunlariek; entrenamendutik libre baina bestelako lanak baziren egiteko. Izan ere, trainerua Amilibiaren lantegira eraman zuten Kontxako sailkapen estropadaren aurretik azken ukituak egiteko. "Egokitu egin dute eta pisua arindu. Soberan dauzka zatitxo batzuk eta pare bat-hiru kilo kentzen saiatuko dira. Trainerua berria da baina gurea beste edozein talderena baino gehiago hondatzen da astebururo errepidean eramaten dugulako batetik bestera; denboraldian barrena 10-12 bidaia egiten ditu gutxienez.  Amilibiarena da trainerua eta konpontzera hona ekartzen dugu eta are gehiago hemen gertu gaudenean. Trainerua txukun utziko diete eta arraunak ere Amilibiarenak diren arren, gogor arraun egin beharko dute zerbait lortu nahi izanez gero.

Sailkatzearekin gustura

Entrenamenduak eginda, trainerua prest eta gogoz joango dira Kontxako sailkapen estropadara Tiraneko arraunlariak. Gauzak zail dauden arren ahalegina egingo dutela diote. Ligan zazpigarren tokian gaude eta sailkapen estropadan postu hori eginez gero barruan geundeke; hori guretzat sekulakoa litzateke. Beste talde batzuk presioa dute postu hobea lortzeko, baina guk hori lortzea denboraldiari bukaera borobila ematea litzateke. Ni TKE Liga hasi zenetik ari naiz eta iaz lortu genuen emaitzarik onena, 9. postua eta aurten zazpigarrenean gaude, beraz, gutxienez mantentzea da gure nahia, dio Ruak.

Kontxarako faborito zein diren galdetuta kiniela egitea zail ikusi du Tiraneko arraunlariak: Faboritoak Urdaibai, Orio edo Castro izan daitezke; San Juan ere ongi dabil eta San Pedro ere igotzen ari da; Hondarribia, Pedreña eta Astillero ere kontuan hartu beharreko taldeak dira, baina Ligan gu haien aurretik gaude eta uste dugu haiek ere kontuan hartuko dutela gu hor gaudela eta zerbait egin dezakegula. Huts gehien egiten duena geldituko da kanpoan. 

Urdaibaiko arraunlaria da Ruaren anaia, baina hark inolako pistarik ez omen dio eman. Talde bakoitzak bere lanerako moduak dituela eta bakoitzak bere entrenatzaileari kasu egiten diola dio Tiranekoak eta bera Daniel Perez entrenatzailearekin oso pozik dagoela. Aholkuak aholku, zazpi lehenengoetan sartzea denentzat zail dagoela uste du Ruak, baina inori ez omen dizkiote gauzak erraz jarriko. Astean anaiari esan diot beraiek Ferraria direla eta gu Renaulta, baina Alonsok Munduko Txapelketa Renaultarekin irabazi zuela.

Dena ikuskizun dago. Traineruak ez du motorrik, baina Tiraneko mutilek erakutsi beharko dute Txurrukan hartutako indarrek balio ote dieten Kontxan ongi aritzeko.

Azokaren inguruan antolatutako ekimenen harira jende asko gerturatu da

Askorentzat oporren amaiera izan den asteburuan jai giroa sumatu da Orion. Izan ere, Arkupe Merkatarien Elkarteak Udalaren babespean antolatutako Stock azoka arrakastatsua izan dela jakinarazi du Iñaki Garcia Orioko Udaleko Merkataritza batzordeko buruak. Arrakasta jendearen partaidetzari ez ezik azokaren harira antolatu diren gainontzeko ekimenei zor zaiela gaineratu du. Eguraldi onak eta arratsaldean jokatutako estropadak herritarrak ez ezik bisitariak ere erakarri ditu asteburuan Oriora eta azokara.

Iazko bideari jarraituz, bigarren urtez antolatu dute azoka eta asteburu honetan pixkanaka errotuz doan ekimena dela igarri dute merkatariek. Horren erakusgarri da aurten iaz baino jende gehiago izan dela eta ondorioz, salmenta kopurua igo egin dela. Egunik jendetsuena larunbata izan zen eta igandean, egun lasaiagoa izan arren, jendea etengabe ibili zen.

Guztira 18 dendek hartu dute parte aurtengoan: Anarri etxerako tresnak; Ardatza emakume arropak; Argiñe arropa denda; Berezi emakume arropak; Dakota artisau denda; Eki Lorea belar denda; Il Gelato izozkiak; Itziar kirolak; Izarra gizonezko arropak; Lore Burdindegia; Lua emakume arropak; Luis Padrones iturgintza; Nahikari ume arropak eta oinetakoak; Orio optika; Orio´s Shop emakume arropak; Ramiro argazkiak; Roxa arropa denda; eta Uranga burdindegia. Orioko Herri Ikastola ere azokan izan zen.

Erosketak egiteko baliatu du azoka jendeak, baina Arkupek, salmenta postuak ez ezik bestelako ekimenak ere antolatu ditu. Larunbatean, jendea goizean goiz erosketak egiten hasi arren, eguerdi partean ibili zen jende gehien eta txarangak ere girotu zituen herriko kaleak. Arratsaldean giroa animatu zuena Azkaiter Pelox Banden kontzertua izan zen.

Igandean ere, umeentzat gaztelu puzgarriak izan ziren eta horrek ere erakarri zituen umeak jolasera eta gurasoak erosketak egitera. Gainera parrillan erretako 400  sardina eta piper plater banatu zituzten.

Azokan parte hartu duten merkatariak, beraz, gustura eta pozik dira jendearen erantzunarekin eta datorren urtean errepikatzeko asmoa azaldu dute.

 

19:00etan hasita, Pilar M. Burgoak emango du hitzaldia Orioko kultur etxean

Sendatze energetikoari buruzko hitzaldia antolatu du Mandalara taldeak bihar –irailaren 3a– arratsalderako. Sendatze Energetiko Holistikoan –Barbara Brennan doktorearen modeloan– Graduatua,  Garapen Pertsonaleko Hezitzailea –Deepra Chopraren filosofiakoa da eta Ayurveda eskolakoa– eta Gestalt Psikoterapian aditua den Pilar M. Burgoak emango du hitzaldia, Orioko kultur etxean. 19:00etan hasiko da saioa eta doakoa izango da.

Irailaren 8a baino lehen jo beharko da Iturbide kaleko eraikinera

Irailaren 8a arte Danbolin Musika Eskolan matrikula egiteko aukera izango dute dantza egiten, instrumenturen bat jotzen ala musikarekin lotutako bestelako jakintzak ikasi nahi dituzten guztiek. 10:00etatik 14:00etara eta 14:30etik 18:30era hartuko dute jendea Iturbide kaleko eraikinean. Informazio gehiago nahi duenak, berriz, 943 83 37 27 telefono zenbakira deitu beharko du.

Behin matrikulak eginda, irailaren 9an hasiko dute 2010-2011 ikasturtea.

Bestalde, datorren asteazkenean, irailaren 8an, 17:00etan, banatuko dute aurtengo ikasturteari dagokion ordutegia.

Europako proban Espainiako taldearekin aritu da gazte oriotarra

Belgikako Hazewinkel herrian 'Coupe de la Jeunesse' edo Gazte-kopa arraun proban gazte kategorian aritu da Aitor Balerdi 16 urteko oriotarra Espainiako taldearekin, baita brontzezko domina eskuratu ere.

Aulki mugikorreko zortzikoan bi kilometroko estropada jokatu zuten bi aldiz. Italia, Britainia Handia eta Frantzia zituzten aurkari eta estropada oso parekatua izan zela dio Balerdik: "Aurreko hilabetean proba honetarako propio prestatzen aritu gara eta entrenamendu gogorrak egin ditugu, baina ez gara bakarrak izan, beste taldeak ere ongi prestatuta baitaude. Proba erdian konturatu ginen borroka estua zela, denok paretsu genbiltzala".

Bi saio egin zituzten eta lehenengoan hirugarren tokian sailkatu ziren Britania Handia eta Italiaren aurretik; bigarren proban, berriz, laugarren. Hala ere, brontzeko dominarekin itzuli ziren Aitor Balerdi eta gainontzeko taldekideak etxera.

Lehen aldia izan du aurtengoa Espainiako taldearekin Europako txapelketa batean oriotarrak. Aurrerantzean ere selekzioaren deia jaso nahi badu gogor entrenatu beharko duela dio gazteak. Orioko taldearekin aurki hasiko da entrenatzen.

Bestalde, Orio Arraun Elkartean ari den Imanol Garmendia donostiarra Txekian izan da Munduko Arraun Lehiaketan. Bigarren urteko gazte kategorian aritu da arraunean eta 8+ modalitatean 10. postua eskuratu du. Garmendia senior kategorian arituko da datorren urtean.

Aitor Balerdi eta Imanol Garmendia Gipuzkoako Foru Aldundiaren kirol programa baten baitan etorkizun oparodun kirolari hautatu dituzte eta baliteke izendapen hori jasotzea.

Bi puntu jan dizkio Urdaibaik Oriori asteburu honetako bi jardunaldietan

San Migel Ligako bandera lortzeko pauso garrantzitsua eman du asteburu honetan Urdaibaiko Bou Bizkaia ontziak, larunbat eta igandean jokatutako bi estropadetan Orioko Mirotzari aurre hartuta. Gurean, Orion, jokatutako bandera eraman zuten Bermeora gainera. Castroko Flaviobriga Bandera, berriz, etxean, Castron bertan, geratu zen.

Orioko XX. Estropadak-XIII. Inmobiliaria Orio Ikurriña

Ustegabeko arazoekin hasi zuen Orioko Arraun Elkarteak abuztuaren 21eko arratsaldea. Kanpoko ziabogako bigarren kaleko baliza lekuz kanpo zegoela konturatu ziren TKEko arduradunak estropada hasi aurretik. Ordubetez baliza bere lekura ekartzen saiatu baziren ere, ez zuten lortu eta estropada erlojuaren kontra jokatzea erabaki zuten arraun elkarte guztietako ordezkariek 17:00etan. Banan-banan, aurreneko kaletik, bi txandatan atera ziren TKE Ligako hamabi ontziak: Zarautzek, Zumaiak, Kaikuk, Hondarribiak, San Pedrok eta Tiranek egin zuten arraun lehenengoan. Pasaitarrek markatu zuten ordura arteko denborarik onena: 20 minutu, 56 segundo eta 78 ehunen.

5 minutuko atsedenaldiaren ostean, Astilleroren txanda izan zen eta atzetik, minuturo, Pedreña, Castro, San Juan, Orio eta Urdaibai irten ziren. San Juandarrei, ordea, istriborreko hankekoaren tosta hautsi zitzaien lehiaren lehen 20 segundotan eta hura konponduta, txandako gainerako 5 ontziek bi luze egin ondoren ekin zioten berriz, hasieratik, norgehiagokari. Oriotarren, pasaitarren eta bermeotarrek parekotasuna erakutsi zuten lehen bi luzeetan. Bigarren ziaboga eman ondoren, ordea, Urdaibaik hortzak estutu zituen eta aurkariei alde egin zien. 20 minutu, 20 segundo eta 88 ehunen behar izan zituen Bou Bizkaiak 3 itsas milia egiteko. 16 segundora iritsi zen Orio –bigarren– eta ia 25era San Juan –hirugarren–.

Argazki gehiago ikusteko klikatu hemen.

XII Bandera Flaviobriga

Larunbateko emaitzak buruan, Castron jokatu zuten asteburuko bigarren estropada TKEko ontziek. San Migel Ligako sailkapen orokorreko azkeneko lau traineruek –Zarautz, Zumaia, Kaiku eta Hondarribia– osatu zuten lehen txanda. Kaiku izan zen lau horien artean azkarrena: 19 minutu, 48 segundo eta 12 ehunen. Atzetik, San Pedrok, Tiranek, Pedreñak eta Astillerok jokatu zuten bigarren txanda. Pasaitarrek ordura arteko denborarik onena egin zuten: 19 minutu, 47 segundo eta 48 ehunen.

Hirugarren txandari dagokionez, aurreneko kaletik jokatu zuen estropada etxeko ontziak, Castrok; alboko kaletik aritu zen arraunean Urdaibai; hirugarrenetik, Orio eta laugarrenetik, San Juan. Pasaitarrek eta bizkaitarrek hartu zuten lehen luzean aurrea, Oriok eta Castrok gertutik, segundora, jarraitzen bazien ere. Bigarren luzetik aurrera, ordea, indarrak hartu eta nagusitasuna erakutsi zuten kantabriarrek. Bigarren postuari eutsi zion Urdaibaik eta txandako bi gipuzkoarrek lehia estua izan zuten hirugarren eta laugarren nor izango ziren erabakitzeko. 15 segundoko aldea atera zion azkenean Castrok bigarren izan zen Urdaibairi; hirugarren eginda, 10 puntu lortu zituen Oriok eta 9 San Juanek.

Liga estua

Bi jardunaldiren faltan, Urdaibai da San Migel Ligako Bandera lortzeko faborito. 166 puntu dituzte bizkaitarrek eta bi puntura dago Orio, 164rekin. Hortik aurrera, handi samarra da tartea: 134 puntu ditu San Juanek eta 125 Castrok.

Kontxako estropada preziatuak jokatuko dituzte datozen bi asteetan (ostegun honetan, irailaren 2an, izango da sailkapen estropada) eta hilaren 18an eta 19an, Bermeon eta Bilbon, izango dituzte aurtengo Ligako azkeneko bi norgehiagokak.

Gipuzkoako Liga bai

Orioko estropadarekin bukatu da aurtengo Gipuzkoako Liga eta emaitza onak lortu dituzte oriotarrek. TKE Ligako aurreko gipuzkoarrak dira, San Juan eta San Pedroren aurretik eta KAE Ligan bigarren dira, Donostiarren atzetik.

Ostiralean izango da emanaldia, 20:30ean hasita

Irailaren 3an, ostiralarekin, udako programazioaren baitako azken emanaldia eskainiko du Orioko Kalakari tabernak. Sorkun artista sonatuaren txanda izango da oraingo honetan. Iluntzeko 20:30ean hasita, kontzertu akustikoa eskainiko du bakarlari errenteriarrak.

Aurtengo udan Kalakarin ematen den hirugarren emanaldia izango da ostiralekoa. Azkaiter Pelox eta Road Bandek diskoa grabatzeko aprobetxatu zuen lehen saioa. Zarauzko Epelde anaien eskutik izan zen bigarren emanaldi berezia: poesia errezitaldiarekin komun bihurtu zuten Kalakari.

Antolatzaileen arabera, udazkenean indarberrituta itzultzeko ilusioz, ez dute urrira arte bestelako ikuskizunik antolatuko.

Sailkapen orokorrean 18. postuan sartu zen helmugan aiarra

Lezaman jokatu zen igandean Lezamako Mugetatik mendi lasterketaren bosgarren edizioa. Emakumezkoetan, iazko garaipena berretsiz Nerea Amilibia korrikalari aiarra izan zen helmugaratzen lehena, Yolanda Gurendez eta Molly Catherine Chambers-en aurretik, lasterketa 2 ordu, 15 minutu eta 17 segundoko denboran bukatuta; sailkapen orokorrean, gainera, 18. postua eskuratu zuen. Gizonezkoetan Jorge Hernando izan zen lehenengo eta ordubete, 58 minutu eta 50 segundu behar izan zituen proba egiteko.

25 kilometroko ibilbidean 1.800 metroko desnibel metatua gainditu behar izan zuten korrikalariek eta izena eman zuten ia 200 parte hartzaileetatik 153 iritsi ziren helmugara.

Denboraldi hasieran emandako erakustaldiak, Zarautzen erakutsitako gorputzaldi bikaina, Kontxarako prestaketa fisiko espezifikoa… izan dituzte hizpide Manu Etxeberriak eta Orioko Arraun Elkarteko prestatzaileak

Beste behin ere, Karkararentzako elkarrizketa egin dio Manu Etxeberriak –www.arraunikasi.com– arraunari lotutako herritar bati. Orioko Arraun Elkarteko prestatzaile Rafa Gonzalez de Txabarrirekin izan da oraingoan. Jarraian duzue bien arteko solasaldia:

Denboraldi hasieran emandako erakustaldiak, Zarautzen erakutsitako gorputzaldi bikaina, eta, noski, Kontxarako prestaketa fisiko espezifikoa izan dira hizpide, besteak beste, arraun taldeko prestatzaile Rafa Gonzalez de Txabarrirekin izandako elkarrizketa honetan. Berak dionez, goi mailako arraunlariak dituzte traineruan; bereziki gazteak ikaragarri saiatuak direla dio, garaipen gose handiz. Eta aurtengo helburua, nola ez bada, Kontxa dela dio.

Manu Etxeberria: Zer moduzko koadrila daukagu fisikoki begiratuta?

Rafa Gonzalez de Txabarri: Oso indartsua. Iaz baino indar gehixeago ere badago txalupan, pisu gehiago dagoen bezala. Hala eta guztiz ere, uretan azkarrago dabil trainerua.

M.E: Ze urtetan izan du Oriok koadrilarik indartsuena?

R.G: Ni nagoenetik, hogei bat urte, esango nuke 2005 eta 2006an izan direla koadrila indartsuena izan dugun urteak. 2002an ere oso indartsua izan zen.

M.E: Aurtengo denboraldi hasiera aparta izan da guretzat. Prestaketa fisiko aldetik izan al da horretarako arrazoirik?

R. G: Bai noski. Denbora gehiago izan dugu prestatzeko beste urtetan baino, aulki  mugikorreko denboraldia lehenago bukatu baitugu. Maiatzerako tostetan lanean ginen, zentratuta. Eta, noski, horrek prestakuntza fisikoan ere izan du zerikusia. Entrenamendu mailak ezberdinak izan dira, mutilak tostetara egokitzeko denbora gehiago edukita.

M.E: Entrenatzaileari berari entzunda, izan dira ere prestaketa fisikoari dagokionez beste tontorrak…   

R.G: Bai, Zarauzko Estropadak beti prestatzen ditugu modu berezian. Gero, Kontxara begira entrenamendu gogorrak egin genituen beste aste bat izan genuen. Hori, noski, asteburuko estropadetan antzematen da, indarra gutxituta baitago, eta nekea ikusten zen mutilengan, normala den bezala.

M.E: Kontxara ondo iritsi al dira mutilak?

R.G: Baietz uste. Hori izan da behintzat aurten ere guretzat helburua, Kontxarako ahalik eta hoberen egotea.

M.E: Gazteek badute tartea Mirotzan, eta ez nolanahikoa. Iñigo Mujika, Iosu Indo, Gorria… Oraindik hobetzerik ba al dute?

R.G: Bai noski, oraindik fisikoki hobera egingo dute, gazteak baitira. Gazte hauek onena dutena zera da, entrenamendu eta estropadetarako grina. Zaharrak balira bezalako heldutasuna dute horretan, beti irabazteko gogoa baitute. Oso lehiakorrak dira.

M.E: B traineruko gazteak, ondo al datoz?

R.G: Aurten baditugu bi oso ondo datozenak: Hodei Alkorta eta Iosu Itsaso. Biak aritu dira estropada batzuetan A-n. Hogei urteko mutilak dira, baina indartsuak dira. Neguan asko muskulatu dira. Oso mutil saiatuak dira; zer egin behar duten esan, eta gehiago egiten dute… Gainera, ze entrenamendu den galdetzen dute, zergatik… alegia, kezkatu egiten direla egin duten entrenamenduarekin, eta hori oso ondo dago.

Ondo bidean, 2011 urte bukaerarako prest izango da eraikin berria

Orioko Udalak lortu behar zituen baimen ofizialak lortuta, hasi dira dagoeneko Orioko Arraun Elkartearen egoitza botatzen. Behin eraikin zaharra txikitu eta lekua garbituta, Arraun eta Piraguismo Teknifikazio Zentroa altxatzen hasiko da Amenabar eraikuntza taldea.

Irailean ziren hastekoak zentro berria egiteko lanak, baina Udaleko bulego teknikotik adierazi dutenez, lanak aurreratu eta abuztuarekin hasi dira. 15 hilabetez arituko dira lanean. Beraz, ezbeharrik edo aldaketarik ezean, 2011ko abenduan bukatuta izango da teknifikazio zentroa.

Eraikinaren gaur egungo egoera errespetatuz, lur azalera berean eta altuera igota, erabilerarako eremu zabalagoa izango duen zentro irekia proposatu dute Jon Begiristain eta Manu Atristain arkitektoek. Izan ere, erakinaren barne antolaketa erabilgarritasuna errazteko bideratuko dute.

Lau solairutan banatuko dute eraikina eta guztietara modu errazean iristeko gune guztiak harremanetan jarriko dituen igogailua izango da. Igogailurako sarrera beheko solairutik, ibaiko aldetik izango du eta baita laugarrenetik ere, errepidetik, alegia. Bestalde, bigarren solairuan arraunlarientzat pasabide pribatua ere izango da.

Lau solairu eta gune gehiago

Beheko solairua ontzien biltegi modura erabiliko dute eta biltegiaren baitan hiru gune izango dira: alokairurako gordelekuak, arrauneko ontzien sotoa eta gainontzeko ontzien biltegia.

Bigarren solairua aldagelentzako gorde dute; alde bat etxeko arraunlarientzat izango da eta kanpokoentzat bestea.

Teknifikazio zentroa, eraikinari izena emango diona, hirugarren solairuan egongo da. 352 metro koadroko gunean mediku, fisioterapia, prestakuntza eta tratamendu berezien zerbitzuak eskainiko dituzte. Prestatzaileek hala ere gela bat izango dute berentzat hirugarren solairu horretan. Horrez gain, beroketa eta muskulaziorako 250 metro koadroko fosoa, erabilera anitzeko gela eta 850 metro koadroko gimnasioa ere izango dira.

Azken solairuan, azkenik, erakustokia eta bulegoak egongo dira eta asmoa da espazio bakarrean dena kokatzea.

Barrutik eta kanpotik argi

Eraikinaren barrura argia sartzeko fatxada gardena egiteaz gain, teilatua ere horretarako baliatuko dute. Estalkia material arinez egingo dute eta baita zulatu ere azken solairura argia sar dadin. Bestalde, eraikinaren euskarri izango diren 14 zutabeak ere argiztatu egingo dituzte herritik argi ikus dadin teknifikazio zentroa non dagoen.

Proiektuari jarraituz, lanak hasi baino ez dira egin, beraz, datorren urte bukaerarako zentro berriak argia ikusiko du hasitako martxari jarraituz gero.

Itxaspe bidean gertatu zen ezbeharra, 19:00ak aldera

Susto ederra hartu zuen atzo arratsaldean Kukuarritik behera parapentean zetorren gizon alemaniar batek. 19:00ak aldera, Itxaspe bidean dagoen pinu batean kateatuta geratu zen Australian jaiotako 35 urteko gizona: Daniel. Lurretik metro gutxira geratu zen zintzilik, baina bere kabuz jaitsi ezinda, larrialdietako zerbitzuetara deitu zuen. Anbulantzia bat, ertzaintzaren auto bat eta suhiltzaileak bertaratu ziren Orioko hondartzara eta aldapan gora, gizona zain zegoen lekuraino heldu ziren, hura askatu eta jaisteko. Zorionez, Danielek ez zuen zauririk eta egoera onean zegoen; susto hutsean geratu zen.

630 224 582 telefono zenbakian eman behar da izena

Aiako Udal igerilekuak antolatuta, bertso afaria izango da datorren larunbatean, irailaren 4an, Aiako igerilekuan. Andoni Egaña eta Sebastian Lizaso izango dira saioko bi protagonistak eta 21:30etik aurrera, umorez betetako gaua eskainiko dute biek. Udako oporrak agurtzeko modua aparta izango dute, hortaz, bertaratzen diren guztiek.

30 euroren truke, bertso saioaz gozatzeaz gain, urdaiazpikoa, patea, olagarroa, txuleta eta postrea jan ahal izango dira igerilekuko tabernan, edariaz lagunduta. Kafea ere sartzen da prezio horretan.

Bestalde, antolatzaileek adierazi dutenez, 100 bat lagunentzako tokia izango da eta interesa dutenek 630 224 582 telefono zenbakira deitu beharko dute, larunbata baino lehen. 

Bihar eta etzi, Antilla hondartzan jokatuko dituzte partidak, 10:30ean hasita

Hondartzako boleibol txapelketa antolatu du Orioko gaztetxeak asteburu honetarako. Bihar eta etzi, 10:30etik aurrera jokatuko dira norgehiagokak Antilla hondartzan. Antolatzaileen arabera, egunean bertan azalduko dira txapelketaren nondik norakoak: araudiak eta abar.

Parte hartu nahi dutenek Kalakari, Unar, Errusta edo Baraka tabernetan eta Olatu dendan eman dezakete izena gaur. Egunean bertan hondartzara garaiz agertuz gero ere hartuko dira taldeak txapelketan aritzeko. Laguneko euro bana ordaindu beharko da partidak jokatu nahi badira.

Lanak gelditzeko eskatuz, presazko mozioa sartu du gaur Udalean Orioko Eusko Alkartasunak

Orioko herritar talde batek Berriz Gure Naia ontzia ez desegiteko deiak ustekabean harrapatu ditu itsasontziko armadorea eta familia. Hala adierazi digu armadorearen seme Asier Urangak. Urangaren hitzetan, ontzia desegiteko azken epea hurbil dute eta hainbeste denboran geldirik egon den ontzia bizirik mantentzeko ekintzak azken orduan etorri dira: ez dugu berria aztertzeko denborarik izan eta ez gaude, momentuz, behintzat, iritzirik emateko moduan.

Bestalde, Orioko Eusko Alkartasunak presazko mozioa sartu du gaur goizean bertan Orioko Udalean, besteak beste lanak berehala gelditzeko eskatuz. EAko presidente Juan Gorostegik bertan adierazten duenez, Berriz Gure Naia ez bada berreskuratzen, gure izaera, arrantzaleek urteetan egindako ahalegina eta ehun urtetako gure armadoreen historia pixkanaka-pixkanaka galtzen ikusiko ditugu, oroitzapen edota lerro batzuetara mugatu arte. Mozioa osorik irakurtzeko klikatu hemen.

Telebista bidez

Herenegun zabaldu zen Berriz Gure Naiaren patua herrian, euskal telebistaren albistegiaren bitartez. Berria berriz lerrootara ekarriz, Orioko egurrezko azken arrantza-ontzia da Berriz Gure Naia eta azken urtean zain egon ondoren, Arostegi tailerraren aurrean dago, desegiteko zain. Hori ikusirik, herritar talde bat, ontziari beste erabilera bat emateko lanean ari da, museo edota turismora edo aisialdira bideratutako ontzi bihurtzeko eskatuz. Orduz geroztik hainbat kultur elkartek, prentsak… agertu dute berriarekiko beren interesa.

Arratsaldeko 19:30ean hasiko da saioa

Haurrei zuzendutako ostegunero programaren baitan, Txerriketan berriketan ikuskizuna eskainiko du Kixka  txotxongilo taldeak gaur bertan. Gaizkile baten menpe dauden bi lagunen komeriak izango dituzte hizpide saioko txotxongiloek. Denbora aurrera joan ahala gero eta txerriago –txerri bihurtzen ari direlako– ikusiko dute beren burua eta bola magiko baten bila aritu beharko dute, bertaratzen diren ume guztiekin batera.

Arratsaldeko 19:30ean hasiko da emanaldia, herriko plazan.

Orion geratzen den egurrezko itsasontzi bakarra da

Orion geratzen den egurrezko itsasontzi bakarra den Berriz Gure Naia desegiten ari direla eta, ontzia bizirik mantentzeko laguntza eskatu du herritar talde batek. Juan Gorostegiren hitzetan, horrelako ezaugarriak dituzten itsasontzi gutxi geratzen da inguruotan eta hondoratu aurretik bestelako erabileraren bat emateko lanean hasi da, besteak beste, Xanti Manterola eta Eusebio Aldaz arrantzale ohiekin batera: arrantza jarduerari baja eman eta museo bihurtu nahi dugu Gure Naia. Erabilera turistikoa eman dakiokegu –Donostiara ibilaldiak antolatu…–, edota egurrezko itsasontziak nolakoak ziren haurrei erakusteko balio dezake, eskola moduan…

Noiz desegingo zuten zain bazeuden ere, duela egun gutxi hasi dira ontzia txikitzeko lanak Arostegi tailerrean. Inork ezer egiten ez zuela ikusita hasi zen orduan Juan Gorostegi lan horiek geratzeko ahaleginak egiten. Egoera plazaratzeari ekin dio aurrena –prentsa eta abarren bidez– eta herriko agintariei berri ematen ari da orain. Diputazioko arduradunekin ere hitz egin du eta datorren astean –Gorostegiren hitzetan, beranduegi, agian– Aldundiko ordezkariren bat Oriora hurbilduko dela agindu diote. Berriz Gure Naia nolakoa den ikusi nahi dute itxuraz.

Gorostegik adierazi digunez itsasontzi bat desegiteagatik diru laguntza ematen du Europar Batasunak eta ez da bidezkoa ontzia museo bihurtzeagatik armadorea zigortzea, diru laguntzarik gabe uztea: beste bide batetik eman beharko litzaioke zor zaiona. Berriz Gure Naiako armadore Gabriel Urangarekin hitz egitekotan direla ere gehitu du Juan Gorostegik.

Berriz Gure Naia deseginda, arrantzan diharduten zazpi itsasontzi geratzen dira Orion –Beti San Luis, Gure Gogoa, Berriz Ave Maria, Kantabriko Berria, Beti Aingeru, Montserrat Berria, San Antonio Berria eta Berriz Gure Naia– eta altzairuzkoak dira guztiak.