...eta kitto! aldizkaria

Euskaldunon Egunkariaren aurkako epaiketa egiten dihardute Madrilen, egunkaria itxi eta zazpi urteren ostean. Horren aurrean, Euskal Herri osoan, eta baita munduko toki ezberdinetan ere, ekimen ezberdinak egin dira auzipetuei elkartasuna erakutsi eta epaiketa salatzeko. Horrela, bihar ekitaldi berezia egingo da Untzagan, 12.30etatik aurrera, Egunkaria Libre aldarria entzunarazteko.
Biharko ekitaldian ikastetxe, musika talde, kirol elkarte, dantza talde, abesbatza, elkarte gastronomiko, dendari, komunikabide eta abarrek hartuko dute parte eta, antolatzaileen berbetan, “herritar guzti-guztiak” daude gonbidatuta ekitaldian parte hartzera
Eguerdian egingo den ekitaldira gerturatzen direnek “marrazki bat, olerki bat, dantza bat, lau berba, kantu bat…” bakoitzak nahi duen baliabidea erabilita islatu ahal izango dute euren aldarria eta horiek guztiak mural batean pilatuko dituzte. Egunkariako auzipetuei babesa emateko egingo den murala amaitu eta Txaltxa Zelaian kokatuko dutela azaldu dute ekitaldiaren antolaketaz arduratu diren Eibarko euskalgintzako eragileek eta jaialdi honetan parte hartzera animatu nahi dute jendea, “Eibarko herriak Egunkariari adierazi dion babes zabala bihar ere ikusiko dugulakoan”.

110. alean Aratosteei errepaso berezia egin die Txikitto!k. Eskoletan pasatutakoak eta asteburuko ekitaldiak argazkitan ikusteko aukera izango da, ikastetxeetako umeek egindako elkarrizketa, txiste, denborapasa eta abarrekin batera.

Juan San Martin Liburutegiaren iazko jardunaren inguruko datuen berri eman zuten martitzenean Mª Jose Telleria Euskara eta Kultura zinegotziak eta Eva Alberdi liburutegiko arduradunak. Urtetik urtera liburutegiko arduradunek zerbitzuak eta eskaintza hobetzeko ahaleginetan dihardute beharrean eta, aurkeztutako datuei begiratuz gero, erabiltzaileek ondo aprobetxatzen dituzte eskaintzen zaizkien baliabideak. Besteak beste, 2009. urtean 168.367 lagunek erabili zuten liburutegia eta bertako liburu zein bestelakoen inguruko 49.139 mailegu egin ziren. Liburutegiak dauzkan bazkideen kopuruak gorantzako joerari eusten dio oraindik ere: 8.179 bazkide zeuden 2009. urtea amaitzean, aurreko urtean baino %8’60 gehiago.

Aste Santu ingururako
Liburutegiko arduradunen helburuetako bat jendea irakurtzera animatzea da eta, horretarako, hainbat jarduera eta programa garatzen dituzte. Aurreko urteetako kanpainekin lortutako emaitzarekin animatuta, ikasturte honetarako prestatutakoak azaldu zituzten: “Ikasturte honetan 7 eta 25 urte bitarteko gazteentzat pentsatutako jarduerak ipiniko ditugu martxan. Horien artean garatuko dugun lehenengoa 7 eta 12 urtekoentzat antolatutako Bookcrossing delakoa izango da. Aste Santu inguruan ordubeteko iraupena izango duten lau saio egiteko asmoa dago, talde birekin. Euskeraz eskainiko dira saioak eta egun bakoitzean esparru baten inguruan jardungo dute: lehenengo saioan liburutegia nola erabili ezagutzera emateko jarduerak egingo dira, bigarren saiorako grabazio-tailerra antolatu dugu, hirugarrenean enkriptazioa landuko da, azken saioan, interesatzen zaiguna nola bilatu ikasiko dute”.
Izena emateko epea martxoaren 1etik 18ra egongo da zabalik eta lau saioetarako matrikulak 5 euro balio du. Udatik aurrera beste kanpaina batzuk garatzeko asmoa dutela aurreratu zuten aste honetako agerraldian: besteak beste, 4 eta 6 urte bitarteeko umeek gurasoekin batera parte-hartzeko tailerrak eta 13-25 urte bitarteko gazteentzat euren interesa pizteko moduko tailer monografikoak egingo dira.

Gaur (eguaztena, hilak 17), 19.00etatik aurrera Amets Arzallus eta Txomin Txueka Portalean egongo dira, Illimani: Boliviako izpiak eta hizkiak izenburuko ikus-entzunezkoa aurkezten eta, ondoren, proiekzioan ikusitakoa komentatzen. Saioa Illunabarrian …eta kitto! Euskara Elkartearen proiektuari jarraituta antolatu dute eta sarrera librea da.

Gaur (martitzena, hilak 16) 19.00etan Daniel Freire aktorea Coliseoan izango da, El actor y sus vidas izenburuko hitzaldia eskaintzen. Juan Ortegak aurkeztutako ekitaldi honekin 33. Antzerki Jardunaldiak inauguratutzat emango dituzte. Bestalde, urteroko moduan, Narruzko Zezen Antzez Artikulu eta Gidoientzako Lehiaketako irabazleek ekitaldian bertan jasoko dute saria.
Gaur hasi eta martxoaren amaierara arte antzerki eskaintza benetan oparoaz gozatzeko aukera izango da Eibarren, Coliseo antzokiak eta Hezkuntza Esparruko aretoak hartuko dituzten lanei esker. Jardunaldietan eskainiko diren antzezlanen inguruko informazioa nahi izanez gero, antolatzaileek argitaratutako programa pdf formatuan jaitsi eta irakurri dezakezue, dokuemtuari klikatuta.

Arrateballe Bizirik taldeko hainbat lagun Pegoran izan dira gaur (otsailak 15, astelehena) eguerdian, Teknikerren egoitza berria Erisono jasotzeko proiektuaren kontra jaso dituzten sinadurak aurkezten. Euren berbetan, Arrateballe babesteko eskaerarekin bat egin duten “milatik gora sinadura” batu dituzte herritarren artean. Horrez gain, Udalbatzari puntu bi jasotzen duen mozioa helarazi diote: lehenengo puntuan Udalari “landa eremua, Arrateballe barne, herriaren ondaretzat hartzeko” eskatzen diote eta bigarren puntuan, berriz, “Arrateballe babestua dagoela bermatzeko egokia den formula juridikoa aurkitzeko konpromisoa hartzea”. Erantsitako dokumentuan gaur Pegoran aurkeztu duten idatzia osorik irakurri dezakezue.

Arrateballe Bizirik taldeko hainbat lagun Pegoran izan dira gaur (otsailak 15, astelehena) eguerdian, Teknikerren egoitza berria Erisono jasotzeko proiektuaren kontra jaso dituzten sinadurak aurkezten. Euren berbetan, Arrateballe babesteko eskaerarekin bat egin duten “milatik gora sinadura” batu dituzte herritarren artean. Horrez gain, Udalbatzari puntu bi jasotzen duen mozioa helarazi diote: lehenengo puntuan Udalari “landa eremua, Arrateballe barne, herriaren ondaretzat hartzeko” eskatzen diote eta bigarren puntuan, berriz, “Arrateballe babestua dagoela bermatzeko egokia den formula juridikoa aurkitzeko konpromisoa hartzea”. Erantsitako dokumentuan gaur Pegoran aurkeztu duten idatzia osorik irakurri dezakezue.

Aratosteetan dotoreen jarritako taberna aukeratzeko lehiaketa Klub Deportiboko tabernak irabazi du aurten, Asterix eta Obelix pertsonaien inguruko apainketarekin. Epaiamahaiko kideek gaur (barixakua) joan dira lehiaketarako izena eman duten 13 tabernak Aratosteetarako nola apaindu eta girotu dituzten ikustera. Lehiaketara aurkeztu diren beste hamabi tabernak hauek dira: Katu Kale (Saloia), Txoko (Txokomantxe), Laurel & Hardy (Mamuak), Vivaldi (Rock-a), Ez Dok (Zirkoa), Xok (San Balentin aurreko ametsgaiztoa), Txurrut (Rock Stars), Aterpe (Neverland), Zelai Bide (Zirkoa), Tas Tas (Txikipark Tas), Koskor (Koskorreko ipuinak) eta Kultu (80ko hamarkada).

Asteburu honetan honako pelikulak ikusteko aukera izango da Coliseoan: El Hombre Lobo, Celda 211, Tiana y el Sapo eta La Cinta Blanca. Albisteari erantsitako dokumentuan egun bakoitzean emango duten filma, ordutegia eta aretoa kontsultatu daitezke.

Atzo Eguen Zuri eguna izanda ere, beste urte batzuetan baino kolore gutxiago ikusi genituen gure kaleetan. Izan ere, egun horretako protagonista nagusiak umeak izaten dira, ikastetxeek antolatzen dituzten kalejira ikusgarriekin, baina hotzarengatik bertan behera laga zituzten kalejirak eta, horren ordez, umeek ikastetxe barruan ospatu zuten jaia. Hori bai, bakoitza bere gelan egonda ere, giro paregabean eman zuten arratsaldea. Eta elurra eta hotza gurekin jarraitzen duten arren, gaur arratsaldean kaldereroen kalejirarekin hasi eta domekara arte, Aratosteetan murgiltzeko moduko ekitaldirik ez zaigu falta. Jarraian, egun bakoitzerako aurreikusitakoak kontsultatu ditzakezue:

Barixaku Erregularra
19.00.- Aratosteetako karpan animazioa, Club Lambrettak girotua.
20.00.- Urkizun hasita, Untzagaraino, Kaldereroen kalejira. Partehartzaileak: Kezka dantza taldea, …eta kitto! Euskara Elkartea, Txolarte, Mauxitxa fanfarrea, Lagun Taldea, Untzagako nagusien egoitzako abesbatza eta Jainagaren trikitixa eskola.
20.30.- Untzaga plazan, Kaldereroen abestiak eta dantzak.
21.00.- Aratosteetako pregoia.
21.30.- Herri afaria, Untzagako karpan.
23.00.- Karaoke lehiaketa, Untzagako karpan.

Aratoste Zapatua
17.00.- Umeendako play-back lehiaketa, Untzagan, …eta kitto! Euskara Elkarteak antolatuta.
17.00.- Umeendako koko-jantzi lehiaketa, As Burgas Galiziako Etxean.
18.00.- Estaziñotik abiatuta, Ustekabekoen kalejira: Toribio Etxebarria, Untzaga, Calbeton, Zuloagatarren.
18.00.- Koko-jantzi lehiaketa eta merendola. Errota gaztelekuan.
18.30.- Umeendako diskoteka, Untzagako karpan, DJ Arnorekin.
19.00.- Txokolate-jana.
19.30.- Ustekabekoen kalejira, Urkizuraino.
20.00.-Koko-jantzitako koadrilen igoera, Untzagara.
23.00.- Dantzaldia, Luhartz taldearekin.
03.00.- Txokolate-jana, Untzagan.

Aratoste Domeka
11.00.- Usartza Txistulari Bandaren kalejira.
12.30.- Pella lehiaketa, Udalak antolatuta.
13.30.- Aratosteetako lehiaketetako sariak banatzea.
17.00.- Umeendako ikuskizuna: “Kortxea doktorearen abenturak”, Sointek taldearen eskutik.
19.00.- Eibarko hip-hop taldearen emanaldia. Untzagan.

Armagintzaren Museoak 12-16 urte bitarteko neska-mutilentzat ipuin lehiaketa antolatu du, “Nazioarteko Museoen eguna eta Armagintzaren Museoaren handitzearen urteurrena direla-eta”. Gaiak, berriz, 2010eko Nazioarteko Museoen eguneko lemarekin (gizarte harmoniarekin) lotura izan beharko du edo, bestela, ipuinean Museoko piezaren bat sartu beharko du egileak. Gutxienez orrialde bat eta gehienez lau izango dituzten ipuinak euskeraz zein gazteleraz aurkeztu daitezke, ordenagailuz idatzia, lerroen artean tarte bikoitza lagata eta Arial 11n. Parte-hartzaile bakoitzak gehien jota ipuin bi aurkezteko aukera izango du.
Lehiaketaren inguruko informazio gehiago eskuratzeko edo lanak entregatzeko Pegorara joan daiteke. Lanak aurkezteko azken eguna martxoaren 30a izango da. Sariak, berriz, maiatzaren 18an emango ditu Museoak, horretarako bereziki antolatuko duten ekitaldian. Lehiaketan parte hartzen duten guztiak gonbidatuko dituzte ekitaldira eta finalistaizango diren 5 ipuinak irakurriko dira. Hizkuntza bakoitzeko hiru onenei 90, 60 eta 45 euroko sari bana emango diete.

Keinu bidezko antzerkia eskainiko dute bost aktorek gaur(eguaztena, hilak 10) arratsaldean, 17.00etatik aurrera, 33. Antzerki Jardunaldien programaren barruan. Untzaga eta Toribio Etxebarria kaleetan izango dira Orlando (indioa), Ana Maria Luna (maitagarri urdina), Jorge Balmaseda (aingeru grisa), Fabián López (gargola) eta Julio García (soldadua), paretik pasatzen direnguztiak aho zabalik lagatzeko prest.

Udako Euskal Unibertsitateak, udaberrirako eskaintzaren barruan, hiru jakintza-alorretan banatutako 8 ikastaro eskainiko ditu Markeskua jauregian, UEUren egoitza nagusian. Informatika eta teknologia berrien ataleko ikastaroak “Web dinamikoen garapena PHP eta MySQL erabiliz”, “Ordenagailua eta Internet euskaraz”, “Wordfast 5- Hastapenak” eta “Ingurugiroa ezagutu. GPS eta GIS baliabideak” dira. Giza eta gizarte gaiak atalari lotutakoak, berriz, “Hezkidetza: XXI. mendeko erronka”, “Coaching programazio neurolinguistikoaz” eta “Buru-mapak: ideia sortu eta antolatzeko teknika”. Eta ikastaro sorta biribiltzeko, osasunarekin lotutako “Etxeko erremedio naturalak” izenburukoa emango da. Dagoeneko ikastaro hauetan izena emateko epea zabalik dago.

Zazpi minutuko iraupena duen Gerra aurreko eskolak Eibarren izenburuko dokumental laburra ekoiztu du Ego Ibarra batzordeak, interneten zintzilikatzeko. Ekoizpena Eibartarren Ahotan ahozko artxiboaren zabalkunderako garatzen diharduten ekimenen testuinguruan kokatu behar da eta, batzordeko arduradunen berbetan, “jende nagusiaren testigantzari esker, herriko gaiak jorratu eta horrelako ekoizpen xumeak baina gustagarriak sarean ipintzen joatea da gure asmoa”. Egoibarra.com webguneko bideotekan ikusgai dagoen ikus-entzunezko honetan gerra aurretik gure herrian zeuden eskolak (Udaletxekoak, Alhondigakoa, Jardiñetakoa, Errebaleko mojena, Kontzeju zaharra, baserri-auzoetakoak...) gogoratzen dituzte, Secundino Loidi, Aurea Mendizabal, Maria Luisa Maitre Jean eta beste batzuen ahotik jasotako zuzeneko testigantzak ardatz.

Tallarra gaztetxeak otsailerako aurreikusitako egitarauari eusten dihardu, eraikina eraisteko proiektuari aurre eginez. Asteburuko kontzertuaren ondoren, atzo bideo emanaldia eskaini zuten Asua Errekako eraikin okupatuan. Gaurko (otsailak 9, martitzena) ekitaldi bi daude iragarrita: 18.00etan gaztetxearen etorkizunaren inguran informazioa zabaltzeko asanblada deitu dute eta, ondoren, 19.00etan, palindromoen tailerra eskainiko da. Barixaku gauerako, berriz, El Trinomio Caótico antzezlanaren emankizuna antolatu dute. Teatro Terror taldeak eskainiko duen lana 22.30etan taularatzekoa da.

Urtarrileko 109. aleaz geroztik, TXIKITTO!-k aro berriari ekin dio: paperari agur esan eta aurrerantzean on-line, interneten baino ez da argitaratuko. Beraz, aurrerantzean sarera jo beharko da bertan azaltzen diren denborapasa, txiste, ipuin, elkarrizketa eta berriak irakurri ahal izateko. Hala ere, edonork jaitsi dezake aldizkariaren PDFa bere ordenagailura eta nahi izanez gero, paperean inprimatu. Eta hori nola egin? Ba oso modu errezean. Hilean behin www.etakitto.com webgunearen azalean egongo da TXIKITTO (bestela ere, webgunean TXIKITTO izeneko atal bat dago eta hor ere egongo da eskuragai, aurreko aleekin batera). Horrez gain, www.eibar.net Udalaren webgunean eta http://eibarko-euskara.com helbidean zintzilikatuko da.

Ego Ibarra batzordeak aspaldi, 1995ean egin zuen ikerketa baten emaitza interneten eskuragarri ipini berri dute, Ego Ibarra batzordearen webgunean: armagintzan erabilitako tresneria edo erremintak jasotzen duen zerrenda, bakoitzaren argazkiarekin eta erreminta bakoitzaren erabileraren inguruko azalpenerekin.
Batzordeko arduradunen berbetan, “ikerketa hori berraztertu eta eguneratu egin da, herriko armaginen aholkuei esker. Bere sasoian katalogoa egin zen eta argazkiak atera ziren horretarako Eibarko tailer asko eta asko bisitatuta (Pedro Arrizabalaga, Vicente Alberdi, Armas Maguregui, Armas Eibar, Pedro Irusta, Villena, County, Parkemy, R. Fernández, Eugenio Gutierrez, Mazorriaga, Zubillaga...). Orain, orduan ateratako argazki guztiak digitalizatu egin dira eta erreminta bakoitza zertarako den zehazten ahalegindu gara, armaginek esandakoa eta bibliografia batuta”. Informazio guztia armagintzaren inguruko atalean, Utillajea izeneko sailean kontsultatu daiteke.

Montekasino tabernak egitarau kulturala prestatu du otsailerako. Egitarauari begiratuz gero, hiru egunetan (eguaztenetan) GNU/Linux ikastaroa eskainiko dute; Shane Meadows zuzendariaren This is England filma ere emango dute, “skinhead mugimenduaren hastapenak apur bat gehiago” ezagutzera emateko asmoarekin; Zinema Arroxa ziklo iraunkorraren barruan, berriz, Roberto Caston zinemagilearen Ander filma emango dute; eta programazioa biribiltzeko, DjAmsia-k kontzertua emango du. Jarraian egitarauaren inguruko informazio zehatzagoa irakur dezakezue:

GNU/Linux ikastaroa:
Otsailak 10, eguaztena: 19.00etan “Zer da GNU/Linux sistema operatiboa?" izenburuko hitzaldia.
Otsailak 17, eguaztena: 18.30etan GNU/Linux sistemak instalatzea. Izena emailez eman eta ekarri zure ordenagailua.
Otsailak 24, eguaztena: 18.30etan GNU/Linux sistema erabiltzen hasi.

Bideo emanaldia:
Otsailak 14, domeka: 19.00etan "This is England" filmaren proiekzioa.

Zinema Arroxa:
Otsailak 21, domeka: 19.00etan "Ander" filmaren proiekzioa.

Kontzertua
Otsailak 28, domeka: DjAmsia-ren kontzertua.

Asteburu honetan honako pelikulak ikusteko aukera izango da Coliseoan: Sherlock Holmes, Celda 211 eta Tiana y el sapo. Erantsitako dokumentuan egun bakoitzean emango duten filma, ordutegia eta aretoa kontsultatu daitezke.
Horrez gain, Amañako Kultur Aretoan Dos canguros muy maduros emango dute domekan 17.00etan (sarrera 2’80 euro).

Joseba Zinkunegi eta Mikel Garaiondo, Batasunaren kontrako operazioan 2008ko otsailean atxilotutako eibartarrak libre lagako dituztela eman du aditzera gaur (barixakua, hilak 5) arratsaldean Amnistiaren Aldeko Mugimenduak, beste hainbat lagunekin batera. Auzitegi Nazionalak lagun bakoitzari 50.000 euroko bermea ipini dio eta denei “jardunbide politikoa izatea” debekatu die. Informazio gehiagorako, hemen klikatu.